Карыкатурыст Аляксандр Каршакевіч выставіў свае малюнкі ў Міністэрстве інфармацыі

Каля 100 карыкатур вядучага мастака часопісу «Вожык» людзі змаглі пабачыць тут ужо з 1 красавіка.  Гэта як і апошнія гумарыстычныя малюнкі, так і нават яго першая работа 1982 года.

Як паведаміў Аляксандр Каршакевіч агенцтву «Минск Новости», міністэрства падтрымала ідэю аб тым, каб штогод у дзень смеху рабіць выставы прац мастакоў-карыкатурыстаў накшталт гэтай. Напрыклад, у 2010 годзе гэта была выстава карыкатурыста Алега Папова. Ужо 20 год ен смяшыць чытачоў сваімі карыкатурамі ў «Народнай газеце». Тады было «прапанавана на суд» гледача каля 500 работ мастака.

Але негледзячы на тое, што, напэўна, кожнаму мастаку, фатографу, дызайнеру ці працуючаму ў СМІ правесці тут сваю персанальную выставу вельмі прэстыжна (усе ж гэта факт прызнання творчага таленту сярод калег), недахоп новых, маладых карыкатурыстаў у Беларусі вельмі адчувальны.

Чаму няма новых мастакоў, якія жадаюць падфарбаваць беларускую журналістыку вострай і салёненькай сатырай? Тут узнікае шмат пытанняў. Нельга казаць пра тое, што ў нас не хапае таленавітых людзей сярод моладзі — яны ёсць. Не дарма ж беларускія мастакі займаюць штогод прызавыя месцы на шматлікіх конкурсах. Але хапае і праблем. Ці так лёгка будзе пражыць маладому карыкатурысту на невялікія ганарары? І самае галоўнае: дзе навучацца? Можа дапамог бы ў гэтым клуб мастакоў-карыкатурыстаў, які прапанавалі стварыць ў тым годзе. Хаця асабліва б хацелася, каб і ў Інстытуце журналістыкі БДУ нарэшце з’явіліся майстар-класы і лекцыі па карыкатуры.

Ксенія Ельяшэвіч