Віцебск – мой маленькі Парыж

Новости

chagall

Беларуская зямля багатая на таленты, яна мае сваю гісторыю, людзей, што склалі яе славу, свае запамінальныя мясціны. Памяць пра ўсё гэта захоўваюць не толькі музеі, але і сама атмасфера города ці мястэчка, пабудовы, пейзаж…
Мой родны горад таксама мае сваю гісторыю, і яго ведаюць у свеце ў першую чаргу дзякуючы работам Марка Шагала. Вы, напэўна, здагадаліся, што я родам з Віцебска. Менавiта яго выявы ёсць на многіх карцінах Шагала. А.Ахматава пісала, што «Шагал ужо прывёз у Парыж свой чароўны Віцебск», але не толькі ў Парыж. Вядома, што віцебскія матывы прысутнічаюць у саборах Майнца, універсітэтах Ніцы і Іерусаліма, на плафоне парыжскай Гранд-Апера.
Зараз я хачу правесці вас дарогамі Марка Шагала па сваім родным горадзе i прапаную вам завочную экскурсію па музеі пад адкрытым небам, якую назвала «Дарогамі Марка Шагала, ці Віцебск – мой маленькі Парыж».
«Мілая» краіна пачыналася для маленькага Марка з вуліцы Пакроўскай. Тут ён нарадзіўся, тут вучыўся і тут упершыню закахаўся. «У мяне няма ніводнай карціны, на якой вы не ўбачыце фрагмента маёй Пакроўскай вуліцы», – казаў мастак у адным з інтэрв’ю.
У 1992 г. у дзень нараджэння майстра адкрыты помнік М. Шагалу. Прыгледзьцеся да гэтай постаці… Стомлены, немалады ўжо мастак прысеў у крэсла, у задумлівасці паднёс руку да твару. Тут, на Пакроўскай, знаходзіцца Дом-музей Шагала. На ўнутраным дворыку збіральны вобраз – «скрыпка Шагала» – інструмент, на якім іграе душа ў хвіліны смутку і радасці, струны якой – гэта ніці ўспамінаў.
Яшчэ адно месца, якое я хачу, каб вы ўбычылi, – мост цераз Дзвіну, па якім бегла закаханая Бэла да свайго Марка. Яна пісала: «Наш мост – рай для нас! З няўтульных кватэр з нізкай столлю мы збягаем на мост, каб кінуць пагляд у неба…» Даўно ўжо няма ні Бэлы, ні Марка, а Дзвіна і Віцьба павольна нясуць свае воды ў вечнасць. Дзесьці тут, за ракой, закончалася юнацтва Шагала, як заканчваецца i наша завочная экскурсiя.
Прыязджайце ў Вiцебск, заходзьце ў музей Марка Шагала і знаёмцеся з творчасцю славутага мастака. Першае, што вы павінны ўбачыць, калi наведаеце мой родны горад, – гэта васількі, бо менавіта гэтыя кветкі, што ўспрымаюцца намі як сімвал Беларусі, былі любімымі ў Марка Захаравiча. Шагала называюць «чараўніком васільковага горада». І наш васілёк, размешчаны на былым Сінім доме, на слупах плошчы Перамогі, – гэта не толькі сімвал “Славянскага базара”, гэта яшчэ і васілёк Шагала, i Багдановічаў васілёк, і васілёк у вянку купалінкі, і васілёк на гербе Беларусі. Гэта сімвал нашай сiнявокай краіны, і сімвал нашага горада ва ўяўленні яго славутага сына.

print



Теги:

Добавить комментарий

Ваш e-mail не будет опубликован. Обязательные поля помечены *