21 лютага ва ўсім свеце адзначаецца Дзень роднай мовы. Асноўная мэта гэтага свята — у чарговы раз звярнуць увагу на прыгажосць розных нацыянальных моў. Напярэдадні гэтай даты мы пацікавіліся ў жыхароў і гасцей сталіцы,на якой мове яны размаўляюць і якую лічаць роднай.
Дзіяна Берасневіч,студэнтка:
— У маім асяроддзі амаль ніхто не размаўляе па-беларуску, таму і мне зручней выкарыстоўваць рускую. Беларускую мову добра разумею, шаную, люблю, калі на ёй чытаюць лекцыі ва ўніверсітэце. І, канечне, лічу яе роднай: гэта мова нашых дзядоў і прадзедаў, наша спадчына.
Наталля Варачаева, таргетолаг:
— Я вельмі люблю сваю родную мову, люблю беларускія песні, вершы, апавяданні. Аднак у паўсядзённым жыцці часцей усё ж такі выкарыстоўваю рускую, бо гэтага патрабуе работа. Атрымліваю вялікую асалоду, калі дапамагаю сыну рабіць хатнія заданні па беларускай мове і літаратуры, разам з ім зноўку вучу вершы (апошняе – “Хлопчык і лётчык” Янкі Купалы). Безумоўна, родную мову трэба ведаць, размаўляць на ёй, помніць яе. Гэта наша гісторыя, наша багацце!
Міраслаў Варачаеў, школьнік:
— Тата і мама з самага маленства вучылі мяне беларускім словам, таму зараз асаблівых цяжкасцей пры яе вывучэнні няма. Яшчэ ў дзіцячым садку неаднаразова ўдзельнічаў у конкурсах з нагоды дня роднай мовы і нават атрымліваў узнагароды. У школе, з сябрамі размаўляю на рускай, бо ўсе навокал гавораць на ёй. Так зручней.
Ангеліна Дзямешка, страхавы агент:
— Паколькі мае бацькі з Азербайджана, то часцяком дома гучаць адразу тры мовы. Аднак руская пераважае. Большасць маіх знаёмых размаўляюць па-руску, яна гучыць на вуліцах, у крамах, банках, кафэ… Напэўна, так уплывае асяроддзе. Вельмі добра, што у нашай краіне дзве дзяржаўныя мовы і ёсць выбар.
Апытанне правяла Дзіяна Бычкова.
Прыемна чытаць матэрыялы на беларускай мове! Наша мова самая мілагучная, пяшчотная, ласкавая, самая прыгожая!!!